من هَمسْ صرخة نبض جواك
تنـتفض
تهرب من الناس ..م المكان.. م الازمنة
تكره حصارك ف الطرق..ظلم القيود الممكنه
حتي السحاب
مش هوه دا اللون اللي ف الحلم اترسم
يكبر ويعلا و......وف النهاية بيترفض.....!
اكسر...
اكسر بُنا الضعف اللي خيم
فوق كتافك واعترض
ايه يعني تتكعبل مادام حتقوم بطل
هدِّم جدار الخوف عشان
تقدر تشوف ..المشكلة
..اجري
فْ غيطان مالهاش بيبان متقفلة
ايه يعني لو هاتتوة مادام
عندك امل
ارجع....
ارجع ف حضن الموجة وانده
ع السنين اللي انقضت
واسأل عن الصوت الي غني ف يوم
بقلبك
ليه سكتْ؟؟؟
"انا كنت زرعه اما اتسقيت
ف الغربه شهد بدال ماتطرح...دبِّلِت
انا كنت غنوة ف حب ايام اتنَسِت..واتبدِّلِت
انا كنت كلمة وروح وكومة اسئلة
وصحاب عرِفت ان الحياة ..
بيهم مملة.. ومذهله!"
وجدار...
وجدار ف اوضة هناك عليه..
صورتي ف اطار...ماعرفش ليه اتبسِّمِت
ماعرفش امتي اتعلمِت
ترمي الكـــراكيب اللي كانت
يوم ف ادراج مكتبي
اللي احتمت فيهم زمان من نفسها
وتدوس برجليها الورق.
وتشوف نهايتة بنفسها
انا كنت فين؟؟
اما البيوت اتغيرت؟؟
واتغير العنوان واصبح مسأله
م الصعب جدا حلها..
انا كنت فين
لما اتمحي
اسمي ومكاني ومهنتي؟؟
واتبدلو بانسان غريب
كاره حاجات بيحبها
حابب حجات مغصوب لها
ناسي النسيم وقت العصاري
وطعم حبات المطر
بعد اما بيهل الشتا
..يخطف اواخر بسمة فوق وش الخريف..
لكن عرفت اتحمله
علشان بترجع ليا احلامي
اللي مجْدُولة بخيطان
شمس الربيع ..يعزف بقلبي
زي عاشق
للكمانجه علي الوتر
لما بايديه بيضمها
واللحن دايما كان بيحلم
بكره ييجي يكمله
ليه الحجات دي اتأخرت؟؟؟
ليه لسه جوايا الطريق مليان سفر...؟؟
ليه لسه صعب اني افتكر؟؟
شئ من بعيد
وازاي احط
الحرف جمب الحرف
واعمل من جديد..
درج واجنده وكراسات
فاضيين وباحلم يتملو
انا مش حضيَّع عمر تاني ف اوله
وابكي علي شوية حاجات
راحت خلاص واتهدِّمت
فوق الحقيقة ..المؤلمه
انا مش حبيع اخر قلم وسط المزاد
وادفع تمن ناس من زمان اتهمِّشت
ماعرفش عنهم غير صور.
.باهته وكئيبه ومظلمة
اتلوِّنِت
بخطوط صريحة من الخدع
مخفيه بين حبة رتوش
انا مش حتوه وسط الوشوش
علشان ملامحي _غصب عني_ اتشَوِّشِت
ليست هناك تعليقات:
إرسال تعليق